சன் டிவி நெட்வொர்க் குழுமத்தின் தலைவர் கலாநிதி மாறன் மீது அவரது சகோதரர் மற்றும் திருச்சி தொகுதி எம்.பி. தயாநிதி மாறன் கடுமையான குற்றச்சாட்டுகளை முன்வைத்து, சட்ட நோட்டீஸ் அனுப்பியுள்ளார். சென்னை Law Dharma Advocates நிறுவனத்தின் வழக்கறிஞர் கே. சுரேஷ் மூலம் அனுப்பப்பட்ட இந்த நோட்டீஸில், கலாநிதி மாறன் சன் டிவி குழும பங்குகளை சட்டவிரோதமாக தனக்கே ஒதுக்கிக் கொண்டது, பண மோசடி, மற்றும் பங்கு சந்தை ஏமாற்றம் போன்ற பல மோசடிகளில் ஈடுபட்டதாக குற்றம் சுமத்தப்பட்டுள்ளது.
முக்கிய குற்றச்சாட்டுகள்
- பங்கு பரிமாற்றத்தில் மோசடி:
2003-ல் முரசொலி மாறன் மரணத்துக்குப் பிறகு, பங்குகள் தாயார் மல்லிகா மாறனுக்கு மாற்றப்பட்டன. ஆனால் இறப்பு சான்றிதழ் மற்றும் வாரிசுச் சான்றிதழ் போன்ற சட்ட ஆவணங்கள் பின்னர் சேர்க்கப்பட்டதால், பரிமாற்றம் முறைகேடாக நடந்ததாக குற்றம் சுமத்தப்பட்டுள்ளது. - தனிப்பட்ட முறையில் பங்குகளை ஒதுக்கல்:
2003 செப்டம்பர் 15-ஆம் தேதி, கலாநிதி மாறன் 12 லட்சம் பங்குகளை தமக்கே ஒதுக்கிக் கொண்டார். அந்த நேரத்தில் பங்கின் சந்தை விலை ரூ.2,500-3,000 இருந்த போதும், பங்கு மதிப்பீடு ரூ.10 மட்டுமே காட்டப்பட்டது. இதற்கான பங்குதாரர் அனுமதி பெறப்படவில்லை. - நம்பிக்கை மோசடி மற்றும் பங்கு உரிமை மீறல்:
பங்குதாரர்களின் நம்பிக்கையை மீறி, நிறுவனம் புதிய முதலீடு தேவையில்லாத நிலையில் பங்குகளை தனக்கே ஒதுக்கிக் கொண்டதாகவும், திட்டமிட்டு மோசடி செய்ததாகவும் குற்றச்சாட்டுகள் உள்ளன.
பண மோசடி மற்றும் சந்தை ஏமாற்றம்
கலாநிதி மாறன் ரூ.8,500 கோடி மதிப்புள்ள மியூச்சுவல் பண்ட் மற்றும் சர்வதேச ரியல் எஸ்டேட் முதலீடுகளில் ஈடுபட்டுள்ளார். BSE, NSE, SEBI போன்ற பங்கு சந்தை நிறுவனங்களில் தவறான ஆவணங்கள் தாக்கல் செய்யப்பட்டுள்ளதாகவும், அரசு விரைந்து Serious Fraud Investigation Office (SFIO) மூலம் விசாரணை நடத்த வேண்டும் என கோரிக்கை விடுக்கப்பட்டுள்ளது.
சட்ட நடவடிக்கையின் எச்சரிக்கை
2003 முதல் இன்று வரை முறைகேடுகள் மூலம் பெற்ற பணமும் சொத்துகளும் திருப்பித் தரப்பட வேண்டும் என்று வழக்கறிஞர் நோட்டீஸில் வலியுறுத்தியுள்ளார். இதற்கான கோரிக்கைகள் ஏற்கப்படாவிட்டால், சிவில் மற்றும் கிரிமினல் வழக்குகள் தொடரப்படும் என எச்சரிக்கப்பட்டுள்ளது.
சன் டிவி குழுமத்தின் பதில்
சன் டிவி நிறுவனம் இதை குடும்ப பிரச்சனை எனக் கூறி, நிறுவன செயல்பாடுகளில் எந்தவொரு பாதிப்பும் ஏற்படாது என்றும் தெரிவித்துள்ளது. ஆனால், இந்த வழக்கு மற்றும் அதற்கான அரசு விசாரணைகள் எதிர்காலத்தில் எவ்வாறு முடிவடைகின்றன என்பது பெரும் கவனத்திற்கு உள்ளாகியுள்ளது.
