சினம் திரை விமர்சனம்

ஜி. என். ஆர். குமாரவேலன் இயக்கத்தில் அருண் விஜய் நடிப்பில் வெளியாகியுள்ள திரைப்படம் சினம். அருண் விஜய்க்கு ஜோடியாக பாலக் லால்வனி மற்றும் முக்கிய கதாபாத்திரத்தில் காளிவெங்கட் நடித்துள்ளார். இப்படத்திற்கு ஷபீர் இசையமைத்துள்ளார்.

நேர்மையான காவல் அதிகாரியான அருண் விஜய் காதல் மனைவி, தூங்கும் முன்னர் கதை கேட்கும் குட்டி குழந்தை என அழகான குடும்பத்துடன் வாழ்ந்து வருகிறார். தனது மனைவியை கொலை செய்தவர்களையும், கொலைக்கான காரணத்தையும் தேடி அலைகிறார் அருண் விஜய்.

கொலைக்கு பின்னால் ஒழிந்துள்ள மர்மம் என்ன? அருண் விஜயின் முயற்சி வெற்றி பெற்றதா? இல்லையா?என்பதே படத்தின் கதை.

முதல் பாதி முழுவதும் அருண் விஜயின் சண்டை காட்சி, கணவன் – மனைவிக்கு இடையே இருக்கும் அன்பு, குழந்தை மீதான பாசம் என நகர்கிறது. இரண்டாம் பாதி முழுவதும் தன் மனைவிக்கு நிகழ்ந்த சம்பவத்தில் எந்த துப்பும் கிடைக்காமல் தவிக்கிறார் அருண் விஜய்.

நாயகனாக நடித்திருக்கும் அருண் விஜய் எப்போதும் போல கட்டுமஸ்தான உடல் தோற்றத்துடன், காவல் அதிகாரி வேடத்திற்கு நன்றாகவே பொருந்தியிருக்கிறார். சண்டை காட்சிகளில் ஸ்கோர் செய்கிறார்.

அருண்விஜய்க்கு பிறகு காளி வெங்கட் தனது கதாபாத்திரத்தை சிறப்பாக நடித்துள்ளார். கதாநாயகி பாலக் லால்வானி சிறிது நேரமே வந்தாலும் நிறைவான நடிப்பை கொடுத்துள்ளார்.

சமூகத்தில் நடக்கும் உண்மை சம்பவங்களை அடிப்படையாக வைத்துகொண்டு, கற்பனை காட்சிகளுடன் படமாக்கியுள்ளனர். ஒரு சில லாஜிக் குறைகளை தவிர்த்து விட்டு பார்த்தல் சினம் ஓகே என சொல்ல வைக்கும்.